June 7, 2020
1:17 AM | 6:02 AM

कांग्रेसले हलो अड्काएको छैन

  24th March 2017 मा प्रकाशित

pradip paudelप्रदीप पौडेल, केन्द्रीय सदस्य, नेपाली कांग्रेस

तीन दिनपछि बस्ने नेपाली कांगे्रसको बैठकले स्थानीय निर्वाचन, उम्मेदवारको मापदण्ड तथा वर्तमान राजनीतिको समीक्ष हुने केन्द्रीय सदस्य प्रदीप पौडेलले बताए । राजनीतिको हलो एमालेले अड्काएको उनको दाबी थियो । वर्तमान राजनीति तथा कांगे्रसको भावी योजनाबारे गरिएको कुराकानी–

० पछिल्लो राजनीतिक अवस्था कांगे्रसले कसरी विश्लेषण गरेको छ ?
– राजनीतिक विश्लेषण गर्नका लागि कांगे्रसले केन्द्रीय कार्यसमितिको बैठक बोलाएको थियो । बैठक विविध कारणले तीन दिनपछि सरेको छ । त्यही बैठकमा हामी राष्ट्रिय राजनीतिको विषयमा छलफल गर्दैछौं । स्थानीय तहको निर्वाचन, त्यसका लागि पार्टीले गर्नुपर्ने कामलाई कसरी व्यवस्थित गर्न सकिन्छ भन्नकै निम्ति पाटीले बैठक बोलाएको हो ।

० राप्रपालाई सरकारमा ल्याउने, आईजीपी काण्डले कांगे्रस बद्नाम भएको चर्चा छ नि ?
– संविधान कार्यान्वयनका लागि निर्वाचन अनिवार्य छ, त्यही निर्वाचनको वातावरण बनाउन खोजिएको हो । व्यवस्थापिका संसदभित्र रहेका राजनीतिक दलहरुलाई समेट्ने, सहमतिमा लिने र निर्वाचनको माध्यमबाट संविधान कार्यान्वयन गरेर अगाडि बढ्ने नेपाली कांगे्रसको मुख्य उद्देश्य हो । संविधान कार्यान्वयन हुन सकेन भने मुलुकमा विभिन्न समस्या आउने निश्चित छ ।

० थे्रस होल्डमा कांगे्रसलाई एमालेले लतारेको हो ?
– अन्तर्राष्ट्रिय क्षेत्रमा यो विषय प्रयोगमा आइसकेको छ । हामीकहाँ पनि यसको अभ्यास पहिले भएको हो । अस्थिर सरकार, अनावश्यक चलखेल हुने, पार्टीले हैसियत प्राप्त गर्न निश्चित मापदण्ड हुनुपर्छ भन्ने कुरा धेरै पहिलेदेखि चर्चा भएको विषय हो । यस विषयमा संसदभित्र दलहरुबीच समझदारी बन्छ भने त्यसलाई नेपाली कांगे्रसले नकरात्मक ढंगले हेर्नु हुँदैन ।

० मधेशी मोर्चालाई सहमतिमा ल्याउने के गर्नुभयो ?
– यतिबेला मोर्चालाई सहमतिमा ल्याउने जे गरिएको छ, त्यो नेपाली कांगे्रसले मात्र गरेको छ । संविधान नमान्नेहरु मान्न तयार हुन्छ भने, निर्वाचनमा आउन आनाकानी गरिरहेकाहरु आउन तयार हुन्छन भने अर्थात् सबै समस्याको हल हुन्छ भने सरकारले प्रस्तुत गरेको संशोधन प्रस्तावमा हाम्रो समर्थन रहन्छ । मधेशले उठाएको मुद्दा उक्साहट मात्र होइन, राजनीतिक विषयहरु पनि छन् भन्ने कुरा कांगे्रसले मात्र गरेको छ । यतिबेला उदारता कांगे्रसले मात्र देखाइरहेको छ ।

० कांगे्रसले मधेशी मोर्चालाई उचालेर निर्वाचन भाँड्न लागेको आरोप छ त ?
– तर्क नभएको विषयसँग कोही पनि पछि लाग्न सक्दैन । निर्वाचनको वातावरण बनाउनका लागि कांगे्रसले कुनै विषयमा अडान राखेको छैन । यो भए हुन्छ भनेर अडान राखेर हालो अड्काएको भए त्यस्ता आरोप लगाउन मिल्छ ।

० कांगे्रसले प्रतिपक्षीसँग गम्भीर छलफल गरेको छैन भन्नेलाई जवाफ के छ ?
– गम्भीर भनेको के हो ? कति पटक गर्नु ? कांगे्रसले छलफल गरिराखेको छ, कुराकानी भएको भए छ । प्रतिपक्षीले जे भन्यो त्यो मान्दा गम्भीर हुन्छ भने अर्को पक्षले पनि नमान्ला । राजनीतिक दलले आफूले भनेका सबै कुरा लागू गर्नुभन्दा विषयमा अडान राखेर प्रकृयामा जान दिनुपर्छ । असहमतिका बुँदालाई राजनीतिक मुद्दा बनाएर निर्वाचनमा गए हुन्छ । भोलि पनि सुधारका ठाउँहरु छन् ।

० कांगे्रस यतिबेला गच्छदारलाई भित्र्याउने, पार्टी बलियो बनाउने अनि चुनाव जाने भन्छन् ?
– कांगे्रससहितको सरकारले वैशाख ३१ गते निर्वाचन घोषणा गरेको छ । ओली सरकारले निर्वाचन घोषणा गर्न सकेन । त्यसकारण निर्वाचनको मिति घोषणा गर्ने पार्टी चुनावको पक्षमा छैन भन्न मिल्दैन । गच्छदार ल्याउने वा पार्टी बलियो बनाउने काम जुन पार्टीले पनि गर्छ । आफ्नो पार्टीलाई जिताउन, स्वच्छ रचनात्मक प्रतिस्पर्धा गर्न जसलाई पनि छुट छ । पार्टी बलियो बनाउने, कांगे्रसको पक्षमा निर्वाचनको महोल बनाउनका लागि नेपाली जनताको स्वार्थलाई सम्बोधन गरेर एजेन्डा बनाउनका निम्ति कसले कसलाई छेकेको छ र ? कांगे्रस पनि त्यो प्रयत्नमा छ, त्यो स्वभाविक हो ।

० गच्छदारलाई कांगे्रसमा भित्र्याउने हल्ला मात्र हो ?
– यस्ता कुरा प्रश्नकर्तालाई थाहा होला, कांगे्रस ठूलो पार्टी हो, विजय गच्छदारको कांगे्रसमा ठूलो योगदान छ, पार्टी मजबुद बनाउन कांगे्रसको सिद्धान्त र आदर्शलाई स्वीकार गरेर जो कोही आउनलाई छुट छ ।

० तोकिएकै मितिमा निर्वाचन हुन्छ ?
– निर्वाचन गर्नुपर्ने अहिलेको एक मात्र प्राथमिक विषय हो । सरकारले अर्जुनदृष्टि दिएर त्यो काम गर्नु जरुरी छ । नेपाली कांगे्रस संविधान कार्यान्वयन गर्न चाहन्छ । निर्वाचनको मिति तोकिएको छ, शंका नगर्न म सबैलाई आग्रह गर्न चाहन्छु ।

प्रतिक्रिया