बनेपा । आगामी वैशाख ३१ गते हुने स्थानीय तहको निर्वाचनका लागि नगरपालिका र गाउँपालिकामा नेतृत्व लिन चाहनेहरुको दौडधुप सुरु भएको छ । राजनीतिक दल आन्तरिक बैठक, भेला तथा प्रशिक्षणमा व्यस्त रहेका बेला स्थानीय तहको निर्वाचनका लागि स्थानीय नेताले आन्तरिक लविङसमेत सुरु गरेका छन् । पार्टीका बैठक, भेला र प्रशिक्षण जारी रहेकाले राजनीतिक दलले भने सम्भावित उम्मेदवारको टुङ्गो लगाउन सकेको छैन् ।
बीस वर्षको रिक्ततापछि राज्यको पुनःसंरचनाअनुसार पहिलो पटक हुन लागेको स्थानीय तहको निर्वाचनका लागि गाउँगाउँमा उत्साहसमेत थपिएको छ । नेकपा एमाले काभ्रेपलाञ्चोकका अध्यक्ष टोकबहादुर वाइवाले पार्टी कमिटिमा उम्मेदवारको विषयमा सर्कुलर नआएकाले उम्मेदवारको टुङ्गो लगाउन अझै केहि समय लाग्ने बताउनुभयो । नेकपा (माओवादी) केन्द्रका अध्यक्ष दिनानाथ गौतमले पार्टीको काम नै नसकिएकोले उम्मेदवारको घोषणा गर्न अझै केही समय लाग्ने बताउनुभयो ।
नेपाली काँग्रेसका उपसभापति अच्युत पौडेलले पार्टी केन्द्रीय कार्यालयबाट कुनै परिपत्र नआएकाले यस सम्बन्धी मापदण्ड बनेपछि मात्रै उम्मेदवारको टुङ्गो लाग्ने बताउनुभयो । नयाँ संरचनाअनुसार काभ्रेपलाञ्चोकमा ६ नगरपालिका र सात गाउँपालिका छन् । जिल्लाका दुई लाख ३७ हजार मतदाताले १८९ मतदानस्थलबाट मतदान गर्नेछन् ।
जिल्लामा यसपटक चार मतदानस्थल र २९ हजार नयाँ मतदाता थपिएको जिल्ला निर्वाचन कार्यालय, धुलिखेलले जनाएको छ । जिल्ला निर्वाचन कार्यालयका प्रमुख मधुकरप्रसाद पोखरेलले काभ्रेपलाञ्चोकमा विभिन्न पदका सात सय ३३ जनप्रतिनिधि निर्वाचित हुने छन् । पुनःसंरचनाअनुसार बनेपा नगरपालिका, धुलिखेल नगरपालिका, पनौती नगरपालिका, पाँचखाल नगरपालिका, नमोबुद्ध नगरपालिका छन् । त्यसैगरी रोशी गाउँपालिका, खानीखोला गाउँपालिका, चौरी देउराली गाउँपालिका, तेमाल गाउँपालिका, बेथानचोक गाउँपालिका, भुम्लु गाउँपालिका र महाभारत गाउँपालिकासहित सात गाउँपालिका यहाँ छन् ।