काठमाडौं । नयाँ शक्ति पार्टी नेपालले संविधान संशोधनपछि मात्र निर्वाचन हुनुपर्नेमा जोड दिएको छ । पार्टी सङ्घीय परिषद्को दोस्रो पूर्ण वैठकबारे जानकारी दिन आज यहाँ आयोजित पत्रकार सम्मेलनमा पार्टीका संयोजक डा बाबुराम भट्टराईले भन्नुभयो – “सबै राजनीतिक दललाई समेट्न, संविधान संशोधनपछि मात्र निर्वाचन हुनुपर्छ ।”

संयोजक भट्टराईले अब हुने निर्वाचन विगतको निरन्तरता नभएर सङ्घीय लोकतान्त्रिक गणतन्त्र प्राप्तिपछिको नयाँ ऐतिहासिक निर्वाचन भएको बताउँदै आफ्नो पार्टीले चुनाव चिन्ह नपाए निर्वाचन हुन नदिने बताउनुभयो ।

“चुनाव चिन्ह विना नयाँ शक्ति पार्टी निर्वाचनमा जाँदैन र जान पनि हुँदैन्,” उहाँले भन्नुभयो – “निर्वाचन आयोगले स्वीकृत गरेको आँखा निर्वाचन चिन्ह नै आफ्नो पार्टीलाई चाहिन्छ ।” पूर्वप्रधानमन्त्रीसमेत रहनुभएका संयोजक डा भट्टराईले संविधान तथा सङ्घीयताको मुख्य चुरो सिमाङ्कन भएकाले मधेश केन्द्रित दलको सहमति बिना हुने निर्वाचनको कुनै औचित्य नहुने बताउनुभयो ।

पार्टी प्रवक्ता खिमलाल देवकोटाले संविधान संशोधन, विशेष क्षेत्र, संरक्षित क्षेत्र र स्वायत्त क्षेत्रको घोषणा, सर्वदलीय सरकार, तीनै तहको निर्वाचन एकै पटक गर्नुपर्नेलगायतका छ वटा सर्त पार्टीले अगाडि सारेको जानकारी दिनुभयो ।

पार्टीले अगाडि सारेका सर्त पूरा नगरे आन्दोलन गर्ने चेतावनीसमेत उहाँले दिनुभयो । संयोजक डा भट्टराईको नेतृत्वमा केन्द्रीय निर्वाचन परिचालन समिति गठन तथा निर्वाचनका लागि सात वटै प्रदेशको उत्प्रेरक र संयोजक समेत तोकेको प्रवक्ता देवकोटाले जानकारी दिनुभयो ।