लन्डन । बेलायतमा रहेका नेपाली सञ्चारकर्मीले नयाँ वर्ष २०७४ भव्यरुपमा मनाए । हिजो आइतबार लन्डनस्थित फेल्थानमा शुभकामना साँझ तथा सांस्कृति कार्यक्रममा दर्जनभन्दा बढी सञ्चारकर्मी भेला भएर नयाँ वर्ष मनाएका हुन् ।
कार्यक्रमको उद्घाटन बेलायतका लागि नेपाली राजदूत डा. दूर्गाबहादुर सुवेदीले पानसमा बत्ती बालेर गरेका थिए । डा. सुवेदीले नयाँ वर्ष २०७४ को शुभकामना मन्तव्यमा नेपाली वर्ष मनाउन अब नेपाल जान नपर्ने बताए । उनले विदेशमा नेपाली कला संस्कृति मैलाउदै आएको बताउदै नयाँ वर्षले खुशीसहित र नयाँ सम्भवना बोकेर आउने बताए । उनले यस्ता उत्सवले नेपालीबीच एकता, सहिष्णुता र भातृत्व विकास हुने विश्वास व्यक्त गरे ।
कार्यक्रममा गोर्खा रेडियोका निर्देशक नरेन्द्र बस्नेतले स्वागत मन्तव्य दिए ।
कार्यक्रममा स्थानीय कलाकारले विविध संस्कृति कार्यक्रम प्रस्तुत गरेका थिए । गायक सुजन पराजुली, दिव्यानी शर्मा, सुजाता काफ्ले, मन्दिरा प्रसाई, चाँद लामालगायतका कलाकारले आफ्नो प्रस्तुति दिएका थिए ।
गोर्खा अनलाइन रेडियोको आयोजनामा भएको कार्यक्रममा रश्मी गौतम, टिया आचार्य, बेन्सन बस्नेत, श्रया क्षेत्री, अमुल्य थापा, अतुल्य शाही, लगायतले नृत्य प्रस्तुत गरेका थिए ।
कार्यक्रममा साहित्यकार नारायण गाउँले, रामशरण सिम्खडाले गजल र बिमला गौतमले कविता पाठ गरेका थिए । पत्रकार वाचस्पति रेग्मीको सम्पादनमा सुरु भएको सीमा—पारी डट कम समाचार प्रोटलको सुरुवात राजदूत डा. सुवेदी र पत्रकार महासंघ यूके अध्यक्ष नरेश खपाङ्गीले गरेका थिए ।
कार्यक्रममा नेपाल पत्रकार महासंघ यूके पूर्वअध्यक्ष चिरन शर्मा, काउन्सिलर बिष्णु गुरुङ, गैरआवासीय नेपाली संघका संस्थापक चिरञ्जीवी ढकाल, समाजसेवी ध्रुव केसीलगायतको उपस्थिति थियो ।