काठमाडौं । गैरआवासीय नेपाली संघ (एनआरएन) ले भूकम्प पीडित गोर्खा लाप्राकवासीका लागि निर्माण गरेको ३ सय घर अक्टुबर अगाडि नै हस्तान्तरण गरिने भएको छ । एनआरएन अध्यक्ष शेष घलेले जारी गरेको विज्ञप्तिभनिएको छ, ‘प्रतिकूल मौसमका बाबजुद केही महिनाबीचमा तीन सय घरको डीपीसी तयार भइसकेको छ । लाप्राकमा हामीले उत्पादन गरेको इट्टाले घरको गारो लगाउने काम सुरु भइसकेको छ । हामी आशा गरौं अक्टोबर अगाडी यी घरहरुको निर्माण सम्पन्न भई भूकम्पपिडीतलाई नयां भूपम्प प्रतिरोधी र आधुनिक घरमा सार्न सफल हुनेछौं ।’

अध्यक्ष घलेले जारी गरेको विज्ञप्ति जस्ताको त्यस्तै
गैरआवासीय नेपाली साथीहरु, यहाँहरुले एकएक डलर काटेर जम्मा पारेको रकमले गोर्खाको दुर्गम हिमाली गाउँ लाप्राकका भूकम्पपिडीतका लागि घर बन्ने क्रम जारी छ । प्रतिकूल मौसम र दुर्गम भूगोगलका बाबजुद हामीले केही महिनाको बिचमा झण्डै तीन सय घरको डीपीसी गरिसकेका छौं । लाप्राकमा हामीले उत्पादन गरेको इट्टाले घरको गारो लगाउने काम सुरु भइसकेको छ । हामी आशा गरौं अक्टोबर अगाडी यी घरहरुको निर्माण सम्पन्न भई भूकम्पपिडीतलाई नयां भूपम्प प्रतिरोधी र आधुनिक घरमा सार्न सफल हुनेछौं । घर निर्माणका लागि ढुंगा नभएका कारण हामीले इटा उत्पादनको सोंच बनाएका थियौं, तर हामीले सोंचेजस्तो सहज भएन, सयौं हण्डर खाएर अन्ततः स्थानीयस्तरमै इटा उत्पादन सफल भएको छ । हामी कस्तो भूगोगलमा काम गरिरहेका छौं भने अहिले लाप्राक पुरै संसारदेखि सम्पर्कबिच्छेदजस्तै छ। त्यहां पुग्ने बाटोहरु पहिरोले बगाएको छ र गैरआवासीय नेपाली संघले बाटो खुलाएर त्यहां सामाग्री पुर्याउने काम गरिरहेको छ । प्रतिकूल मौसमका कारण हेलिकोप्टरसमेत पुग्न सक्दैन । निर्माणस्थलमा हिलोको आहाल छ, स्वदेशी बिदेशी स्वयंसेवक तथा निर्माणकर्मीहरु धमाधम घर निर्माणमा ब्यस्त हुनुहुन्छ । अघिल्लो सातामात्र हामी लाप्राक बसेर फर्किएका थियौं । सायद यही हो, हामीले भन्ने गरेको राष्ट्र पुनःनिर्माणमा सच्चा साझेदार भनेको । यति दुर्गम र असहज ठाउंमा हामीले एकीकृत नमुना वस्ती निर्माणको अभियानलाई सफल बनाउनै लागेका छौं । यो प्रकृयामा सहभागी सवैलाई धन्यबाद । अब हामी सवैले होस्टेमा हैंसे गरेर यो अभियानलाई सार्थक बनाउनुपर्छ ।
डा. शेष घले
१८ जुलाई, २०१७