काठमाडौं । गुल्मी र ओखलढुंगामा सोमबार भएको दुर्घटना १८ जनाको मृत्यु भएको छ । बुटवलबाट गुल्मीको सदरमुकाम तम्घास आउँदै गरेको माइक्रो बस गुल्मीको वीरवासमा दुर्घटना हुँदा ९ जनाको मृत्यु भएको छ  भने उदयपुरको कटारीबाट ओखलढुंगा जाँदै गरेको ना १ ज ३४०४ नम्बरको सुमो जिप आज दिनको २ बजे सिद्धिचरण लोकमार्गअन्तर्गत कटारी नगरपालिका–११ को ठाटीमा दुर्घटना हुँदा ९ जनाको घटनास्थलमा नै मृत्यु भएको छ । दुई जनाको उद्धार गरिएको छ ।
सोमबार बिहान तम्घासका लागि छुटेको बा४ख ५५०१ नंको माइक्रो गुल्मी दरबार गाउँपालिका वडा नं ४ मा दुर्घटना भएको हो । दुर्घटनामा सातजनाको मृत्यु भएको र छजना घाइते भएको जिल्ला प्रहरी कार्यालयका प्रहरी उपरीक्षक अनुरागकुमार द्विवेदीले जानकारी दिनुभयो । बुटवलबाट १३ जना यात्रु लिएर उक्त माइक्रोबस तम्घास आएको थियो ।
दुर्घटनमा मृत्यु हुनेहको सनाखत हुन नसकेको र प्रहरी र स्थानीयवासी उद्धार कार्यमा जुटिरहेको प्रमुख जिल्ला अधिकारी गोपाल आर्यालले जानकारी दिनुभयो । घाइतेको अवस्था हेरेर प्रहरीलाई पाल्पा पठाउन भनिएको उहाँले बताउनुभयो । दुर्घटनाको कारण खुल्न सकेको छैन । गाडीमा चालकसहित १५ जना रएकामा अन्य दुईजनाको खोजी भइरहेको प्रहरीले जनाएको छ ।

यता, इलाका प्रहरी कार्यालय कटारीका अनुसार चालक हरि कार्कीसहित ११ जना यात्रु बोकेर कटारीबाट ओखलढुंगा जाँदै गरेको उक्त जिप ठाटीको सडकको भिरबाट ५०० मिटर तल खस्दा घटनास्थलमा नौजनाको मृत्यु भएको हो ।
भर्खरै प्रहरी घटनास्थलमा पुगे पनि मृतक यात्रुको शव भिरमा नै अड्किएका कारण निकाल्न कठिनाइ भइरहेको कुरा इलाका प्रहरी कार्यालय कटारीका प्रमुख महेन्द्रकुमार श्रेष्ठले बताउनुभएको छ ।
यता चालकलाई अस्पताल पु-याएपछि उपचारका क्रममा मृत्यु भएको र आठ वर्षीय बालक र एक महिला भने घाइते अवस्थामा भेटिएका कारण स्थानीयवासीले प्रहरी पुग्नु अगाडि नै उद्धार गरेर निकालेको पनि प्रहरीले बताएको छ ।
घाइते दुईजनालाई अहिले उपचारका लागि कटारी अस्पताल लगिएको पनि प्रहरीले बताएको छ । मृतकका शव पहरामा अड्केका कारण निकाल्न कठिनाइ भएकाले नाम र ठेगानासमेत पहिचान गर्न कठिनाइ भइरहेको पनि प्रहरी प्रमुख श्रेष्ठले बताउनुभयो ।
घटनास्थलमा अहिले थप प्रहरी फोर्ससहित ठूलो सङ्ख्यामा स्थानीयवासी भेला भएर भिरमा अड्केका शव निकाल्ने प्रयास भइरहेको छ । यता दुर्घटनामा परेको जिप भने ५०० मिटर तल खोलामा खसेको प्रहरीले बताएको छ ।
जिप दुर्घटनाको कारण उकालो बाटोमा बढी लोड भएका कारण जिपले लोड तान्न नसक्दा पछाडि झरेर दुर्घटना भएको हुनसक्ने प्रहरीले बताएको छ । घटनास्थल कटारी बजारदेखि १३ किलोमिटर पश्चिम पहाडी क्षेत्रमा पर्दछ ।