१५ चैत्र २०८०, बिहीबार
Follow Us

बझाङको मुद्धा , अन्तर्राष्ट्रिय नाका

sarusaru
२१ कार्तिक २०७४, मंगलवार ०४:०४

कार्तिक २१, २०७४-उत्तरी हिमाली जिल्ला बझाङमा आगामी मंसिर १० मा हुने प्रतिनिधिसभा तथा प्रदेशसभा चुनावमा जिल्लाबाट रसुवागढी–केरुङ नाकाजस्तै चीनसित अन्तर्राष्ट्रिय व्यापारिक नाका तत्काल खोल्ने प्रमुख चुनावी मुद्दा बनेको छ । बझाङको उरै भन्ज्याङसँग जोडिएको तिब्बतको ताक्लाकोट पुरानो व्यापारिक नाका हो । सडक सञ्जाल नभएका कारण यो नाका खुल्न सकेको छैन ।

दुवै प्रमुख पार्टी कांग्रेस र एमाले–माओवादी केन्द्र गठबन्धनका उम्मेदवारले सदरमुकाम चैनपुरबाट नेपाली सीमा उरै भन्ज्याङसम्म सक्दो छिटो सडक सञ्जाल पुर्‍याएर ताक्लाकोट नाका खोल्ने मुद्दालाई पहिलो प्राथमिकतामा राखेका छन् । चैनपुर–ताक्लाकोट सडक खुले तिब्बतसित व्यापारिक नाका खुल्ने र चीनको चर्चित धार्मिक स्थल मानसरोवरसम्म आउजाउ गर्ने मुलुककै प्रमुख पर्यटकीय मार्ग बन्ने नाराले मतदाता आकर्षित गरिरहेको छ । प्रस्तावित नाका आइपुग्न चीनतर्फ जम्मा २० किमि सडक बन्न बाँकी छ । तिब्बत सरकारले बाँकी सडक बनाउनसमेत टेन्डर गरिसकेको छ । ताक्लाकोट चैनपुरबाट १ सय ३ किलोमिटर दूरीमा पर्छ । चैनपुरबाट ताक्लाकोट जाने २५ किमि सडक बनिसकेको छ भने थप १० किमि ट्रयाकसमेत खुलिसकेको छ । यो सडक बनाउन सरकारले १ अर्ब रुपैयाँ विनियोजन गरेको छ । नेपालको हिल्सा र तातोपानी नाकाबाट भारतीय हजारौं तीर्थयात्रु मानसरोवर जाने गर्छन् । भारतको नयाँदिल्लीबाट यो नाका हुँदै मानसरोवर पुग्न जम्मा ७ सय किमि पर्छ । ७ नम्बर प्रदेशका लागि आवश्यक सामान चीनबाट ल्याउन र निर्यात गर्न पनि यही नाका सहज हुनेछ ।
कांग्रेस र वामपन्थी गठबन्धन दुवैले आफ्नो पार्टीले जितेर सरकार बनाउनासाथ चिनियाँ सरकारसित कूटनीतिक पहल गरी नाका खोल्न सहमति गर्ने वाचा मतदातासमक्ष गरिरहेका छन् । औपचारिक रूपमा नाका नखुलेको र दुवैतर्फ भन्सार नभएकाले यो नाकाबाट हाल जडीबुटी, रक्तचन्दन र वन्यजन्तुको छाला तस्करी मात्र हुने गरेको छ । नाका खुल्नासाथ जिल्ला व्यापारिक केन्द्र बन्ने र धार्मिक पर्यटनबाट जिल्लाको अर्थतन्त्रमा कायापलट हुने विश्वास कांग्रेस र वाम गठबन्धनको छ । ‘जिल्लाको समृद्धिका लागि ताक्लाकोट नाका खोल्ने हाम्रो पहिलो मुद्दा हो,’ प्रतिनिधिसभातर्फ कांग्रेसका उम्मेदवार पुथ्वीबहादुर सिंहले भने ।
एमालेका उम्मेदवार भैरवबहादुर सिंहले पनि ताक्लाकोट नाका खोल्ने वाम गठबन्धनको पहिलो प्राथमिकता भएको बताए । ‘नाका खुलेपछि जिल्लाको कायापलट हुने विश्वास छ,’ उनले भने ।
दुवै दलले नाकापछि जिल्लाभर सडक सञ्जाल विस्तार गर्ने र सबै स्थानीय तहमा विद्युतको केन्द्रीय प्रसारण लाइन पुर्‍याउने कुरालाई दोस्रो ठूलो मुद्दा बनारहेका छन् । ‘जिल्लाका सबै स्थानीय तहमा विद्युतको राष्ट्रिय प्रसारण लाइन पुर्‍याएर बझाङलाई उज्यालो बनाउने र जिल्लाभर सडक सञ्जाल पुर्‍याउने र भएकालाई स्तरोन्नति गर्ने हाम्रो दोस्रो प्राथमिकता हो,’ एमाले उम्मेदवार सिंहले भने ।
कांग्रेस उम्मेदवार सिंहले आफ्नो पार्टीले निर्माणाधीन खोड्पे–चैनपुर १३३ केभी प्रसारण लाइन छिटो निर्माण सक्ने र सबै स्थानीय तहमा प्रसारण लाइन ५ वर्षमा पुर्‍याउने मुद्दालाई दोस्रो प्राथमिकतामा राखेको बताए । जिल्लामा २५० मेगवाटको माथिल्लो सेती जलविद्युत् आयोजना बनाउनेसमेत दुवै दलको एजेन्डा छ । व्यावसायिक र रोजगारमूलक शिक्षा, गुणस्तरीय स्वास्थ्य सुविधा, ‘एक घर एक खानेपानी धारा’ लाई समेत दुवै दलले प्राथमिकतामा राखेका छन् । जिल्लामा आर्थिक उपार्जन हुने गरी विकास निर्माणलाई अघि बढाउने वाचा दुवै दलले गरेका छन् । कांग्रेस उम्मेदवार सिंहले हालका स्वास्थ्य चौकी काम नलाग्ने उल्लेख गर्दै सबै स्थानीय तहमा गुणस्तरीय स्वास्थ्य सेवा दिने अत्याधुनिक अस्पताल खोल्ने आफ्नो पार्टीको एजेन्डा रहेको जनाए ।
जडीबुटी प्रशोधन केन्द्र अर्को मुद्दा
दुवै दलले यार्सागुम्बुसहित सयौं प्रकारका जडीबुटी पाइने यस जिल्लामा दलहरूले बझाङमै जडीबुटी प्रशोधन केन्द्र खोल्ने वाचा गरेका छन् । बझाङ मुलुकमै सबभन्दा बढी जडीबुटी पाइने जिल्लामध्ये पर्छ । प्रशोधन केन्द्र नहुँदा जडीबुटी टिप्ने सर्वसाधारणले राम्रो ज्याला र बेच्ने व्यापारीले उचित मूल्य तथा राज्यले राजस्व पाउन नसकेको उल्लेख गर्दै एमाले उम्मेदवार सिंहले जिल्लामा प्रशोधन केन्द्र खोले सर्वसाधारण, व्यापारी तथा राज्यले उचित मुनाफा पाउने र जिल्लामा रोजगारी बढ्ने विश्वास व्यक्त गरे ।
कांग्रेस र वाम गठबन्धन दुवैले जिल्लाको प्रतिनिधिसभाको १ र प्रदेशसभाका दुवै सिट जित्ने दाबी गरेका छन् । प्रतिनिधिसभामा कांग्रेसबाट पृथ्वीबहादुर सिंह र वाम गठबन्धनबाट एमालेका भैरवबहादुर सिंह उम्मेदवार छन् । प्रदेशसभा ‘क’ र ‘ख’ मा कांग्रेसबाट चन्द्रादेवी जोशी र नरेशबहादुर सिंह तथा वाम गठबन्धनबाट एमालेका अर्ज‘नबहादुर थापा र माओवादी केन्द्रकी देवकी मल्ल उम्मेदवार छन् । तीन सिटका लागि अरू एक दर्जन बढीले उम्मेदवारी दिए पनि यहाँ कांग्रेस र वाम उम्मेदवारको मात्र चर्चा छ ।
एमाले उम्मेदवार सिंहले दोस्रो संविधानसभा र स्थानीय तह चुनावमा कांग्रेसको भन्दा १४ हजार बढी मत ल्याएकाले आफ्नो गठबन्धनका तीनै जना उम्मेदवारले जित्ने दाबी गरे । वाम गठबन्धन बनेपछि जनता उत्साहित भएको दाबीसमेत उनको छ ।
कांग्रेसका सिंहले आफूसहित पार्टीका तीनै जना उम्मेदवार जनताबीच बढी भिजेको हुनाले जित्ने दाबी गर्दै भने, ‘वाम गठबन्धनका उम्मेदवार दसैंमा मात्र टीका लाउन आउने टुरिस्ट हुन् । हाम्रो पार्टीका उम्मेदवार सधैं जनतामाझ बसेका छन् । त्यही कारण कांग्रेसले जित्छ ।’