काठमाडौं । नेकपा माओवादी केन्द्रको संगठन भद्रगोल बनेको छ। आगामी पुसमा महाधिवेशन गर्न दुई हजार चार सय ८३ सदस्यीय आयोजक समिति बनाइएको छ।

पार्टीको माथिल्लो निकाय केन्द्रीय कार्यालय ३३ सदस्यीय बनाउने निर्णय माओवादीको छ। तर अहिले २३ जना मात्रै छन्। ९९ सदस्यीय सचिवालयमा ८१ सदस्य छन्। दुई सय ९९ सदस्यीय पोलिटब्युरोमा दुई सय २२ सदस्य रहे पनि पछिल्लो समय केही सदस्य थपिएको छ।
यसअघि नौ सय ९९ सदस्यीय केन्द्रीय महाधिवेशन आयोजक समिति बनाउँदा पार्टी एकतामा आएका सबै माओवादी घटकले संख्यात्मक रूपमा भागबन्डा लगाएका थिए। पूर्ववत् एमाओवादी र माओवादी क्रान्तिकारीको रामबहादुर थापा बादल पक्षका भने संख्या निर्धारण गरी थप गर्न सकिने र अन्य पार्टी तथा समूहका भने केन्द्रीय समितिलाई मात्र समेट्ने गरी मापदण्ड बनाएको थियो।

त्यसपछि भने जिल्ला तहबाट सिफारिस भएर आएकाको कुनै जााचकी मापदण्ड नबनाई आयोजक समितिमा थपिएका हुन्। नौ सय ९९ संख्याको आयोजक समिति हुदा पूर्ववत् एमाओवादीबाट ६ सय ३८, बादल पक्षबाट दुई सय ९८, मातृका यादव पक्षबाट २४ जना, मणि थापा पक्षबाट १४ जना र अन्य अरू समूहबाट समेटेर बनाइएको थियो।

विप्लव माओवादीबाट विद्रोह गरेर आएकाबाट पनि १५ जनाले स्थान पाएका थिए। त्यसपछि भने जिल्ला, विशेष जिल्ला र जवस मोर्चाका तर्फबाट नेताहरूलाई समेट्दै जादा २४८३ सदस्यीय रहेको भद्रगोल आयोजक समिति बनेको नेताहरूको भनाइ छ ।