१६ चैत्र २०८०, शुक्रबार
Follow Us

एमाले फुटाएर दुईतिहाइ पु-याउने खेल सुरु

नेपालब्रिटेन डट कम्
२६ भाद्र २०७३, आईतवार ०५:४९

काठमाडौं । नेकपा एमालेका नेता झलनाथ खनालले गुटबन्दीले पार्टीलाई विभाजनतर्फ लग्ने चेतावनी दिएका छन । काठमाण्डौ डल्लुमा भएको कार्यक्रममा नेता खनालले गुटको संरक्षण गर्ने बहानामा पाटी विभाजन गराउने खेल भैरहेको बताए । उनको यो भनाइ हिजो शनिबार सम्पन्न स्थायी समितिको बैठकपछि बाहिर आएको हो । कोठे अधिवेशन र गुटबन्दीले एमाले पार्टी गतल दिशा तर्फ धकेलिदै गएको बताउदै उनले सचेत हुन कार्यकर्ताहरुलाई आग्रह समेत गरे ।

यता, एमाले अध्यक्ष तथा पूर्वप्रधानमन्त्री केपी ओलीले संविधान संशोधनका लागि संसद्मा दुईतिहाइ मत पुर्‍याउन आफ्नो पार्टी फुटाउने गम्भीर षड्यन्त्र भइरहेको दाबी गरेका छन्।

पार्टी कार्यालय धुम्बाराहीमा शनिबार बसेको स्थायी समिति बैठकमा ओलीले विदेशी शक्तिले त्यस्तो षड्यन्त्र गरेकाले एकताबद्ध र संगठित प्रतिवाद गर्नुपर्ने आवश्यकतासमेत औाल्याए । तर, कुन शक्तिले पार्टी फुटाउने षड्यन्त्रका के–कस्ता योजना बनाइरहेका छन् भन्ने कुरा ओलीले स्पष्टसँग खुलाएका छैनन् ।

उनले एमालेबाहेक राप्रपा नेपाललगायतका अरू राष्ट्रवादी शक्तिलाई समेत जसरी पनि फुटाएर संविधान संशोधनका लागि दुईतिहाइ पुर्‍याउने खेल भइरहेकोसमेत चर्चा गरे। ‘उहाँले संविधान संशोधनका लागि एमालेलगायतका राष्ट्रवादी शक्तिलाई फुटाउने षड्यन्त्र भइरहेकाले गम्भीर बन्नुपर्ने भनाइ राख्नुभयो,’ ओलीलाई उद्धृत गर्दै एक पदाधिकारीले भने।

सरकारले प्रधानमन्त्रीको भारत भ्रमणअगावै आन्दोलनरत संघीय गठबन्धनमा आबद्ध मधेसी मोर्चाको माग पूरा गर्न संविधान संशोधन प्रस्ताव संसद्मा दर्ता गर्ने गृहकार्य गरिरहेका वेला प्रमुख विपक्षी एमाले अध्यक्ष ओलीले स्थायी समितिमा त्यस्तो भनाइ राखेका हुन्।