काठमाडौं । रक्षामन्त्री ईश्वर पोखरेलले फागुनभित्रै आवश्यक कानून निर्माण गरिसक्ने दावी गर्नुभएको छ । संसद्को जारी बैठकले आवश्यक कानून फागुनभित्रै निर्माण गर्ने उहाँले बताउनुभयो ।

संविधानमा व्यवस्था भएका सुन्दर पक्षलाई लागू गर्न कानूनको अभाव भएको भन्दै उहाँले कानून बनेपछि कानून अनुसारको संरचना निर्माणलाई जोड दिइने बताउनुभयो । केपी ओली प्रधानमन्त्रीमा निर्वाचित भएपछि संसद्ले २६ वटा कानून निर्माण गरेको जानकारी दिँदै उहाँले भन्नुभयो, “जारी संसद्मा सबै कानून निर्माण भइसक्नेछ ।”

राजनीतिक संक्रमण सकिएपनि प्रशासनिक संक्रमण कायमै रहेको बताउँदै उहाँले सोही कारण देशमा अन्योलको स्थिति देखा परेको बताउनुभयो । सरकारले हालै मात्र पारित गरेको कर्मचारी अध्यादेशको विरुद्ध कर्मचारीको विरोध अनावश्यक रहेको भन्दै मन्त्री पोखरेलले अध्यादेशमा भएका असहमतिलाई सच्याउन सकिने धारणा व्यक्त गर्नुभयो ।

उहाँले केपी ओली नेतृत्वको सरकारले पाँच वर्षभित्र सामाजिक सुरक्षा भत्ता रु पाँच हजार पु-याउने समेत घोषणा गर्नुभयो । आफूहरुले चुनावी घोषणापत्रमा सामाजिक सुरक्षा भत्ता रु पाँच हजार पु-याउने उल्लेख गरेको स्मरण गराउँदै मन्त्री पोखरेलले भन्नुभयो, “कतिपयले सरकारले सामाजिक सुरक्षा भत्ता बढाउने घोषणा पूरा गरेन भन्नुभएको छ, हामीले भनेका छौँ हाम्रै कार्यकालमा उक्त भत्ता रु पाँच हजार पु-याइनेछ ।”