लण्डन । लण्डनको लर्ड्स क्रिकेट मैदानमा नेपालले आउँदो वर्ष पनि खेल्ने भएको छ । विश्वविख्यात यस क्रिकेट मैदानमा यसअघि दुई पटक खेलिसकेको नेपालले आफ्नो तेस्रो लर्ड्स यात्रा सन् २०२० को अगस्टमा गर्ने भएको हो ।
नेपालले अगस्ट २४ तारिख सोमबारका दिन बेलायतको मेर्लिबोन क्रिकेट क्लब (एमसिसी) संग एकदिवसीय खेल खेल्ने तालिका लर्ड्सले सार्वजनिक गरेको छ । हालै मात्रै एमसिसीको टोलीले नेपालको भ्रमण गरेको थियो ।
यसअघि नेपालले पहिलोपटक सन् २०१६ मा लर्ड्स मैदानमा एमसिसीसंगै खेलेको थियो ।
दोस्रोपटक सन् २०१८ मा नेपालले लर्ड्समा एमसिसी र नेदरल्याण्डसंग त्रिकोणात्मक टि ट्वान्टी खेल्ने अवसर पाएको थियो ।
विश्व क्रिकेटमै प्रतिष्ठित लर्ड्स मैदानमा खेलिने खेललाई नेपाली टोलीले अवसरका रुपमा लिने गरेको छ ।
पहिलोपटक नेपालले लर्ड्समा खेल्दा नेपाली खेलाडीको हौसला बढाउनका लागि बेलायतबासी हजारौं नेपाली उपस्थित भएका थिए ।