लण्डन । बेलायतका एक अग्रज समाजसेवी सुर्य गुरुङ सञ्चालक रहेको फार्नबोरोस्थित गोर्खा प्यालेस रेष्टुरेण्टले अल्डरसटमा निर्माणाधिन प्रथम भिसी विजेता गोर्खाको शालिकका लागि ४ हजार पाउण्ड सहयोग गर्ने भएको छ ।
आफ्नो २१ औं वार्षिकोत्सवका अवसरमा रेष्टुरेन्टले आइतबार आयोजना गरेको च्यारिटी कार्यक्रमबाट संकलित रकममा केहि थप गरी सहयोग गर्न लागेको हो ।

अल्डरसटको प्रिन्सेस गार्डेनमा भिक्टोरिया क्रस पदक विजेता पहिलो नेपाली कुलबीर थापाको सालिक निर्माण हुंदैछ ।

‘मैले जीवनको सबैभन्दा बढि समय करिब २१ वर्ष रसमोरमै बिताएं । होम अफ ब्रिटिश गोर्खा भनिने रश्मोर अल्डरसटमा पहिलो भिसी विजेताको सालिक बन्न लाग्दा स्वतस्फूर्त सहयोग गर्ने सोच आयो’, गोर्खा प्यालेसका प्रवन्ध निर्देशक एवम् समाजसेवी सुर्य गुरुङले भने । उनले भिसीको सालिक नेपाल, समस्त नेपाली र गोर्खाको गौरवको विषय भएकाले उक्त प्रोजेक्टलाई सहयोग गर्न अरुलाई पनि अपिल गरे ।

बेलायतमा नेपालीहरुको होमटाउन नै जस्तै बनेको छ अल्डरसट । यहि ठाउँमा स्थापना हुने भिसीको सालिकले हामी सबै नेपालीहरुको पहिचान झल्काउने काम गर्नेछ, समाजसेवी गुरुङलाई आशा छ, यो शालिक बेलायतमा हुर्किंदै गरेको हाम्रो नयाँ पुस्तामाझ हाम्रो इतिहास, परम्परा र संस्कृतिको प्रतीक बनेर उभिनेछ ।
सालिकका लागि आवश्यक कोष जुटाएर समयभित्रै निर्माण पूरा गर्न सके यसबाट यहाँको स्थानीय बेलायती समुदायमा समेत नेपालीहरुबीचको एकता र कामप्रतिको समपर्णबारे सकारात्मक सन्देश जाने उनको विश्वास छ ।

स्थानीय रश्मोर बरो काउन्सिलकी मेयर सु कार्टरको प्रमुख आतिथ्यमा भएको वार्षिकोत्सव कार्यक्रममा डिष्ट्रिक्ट लिडर डेभिड क्लीफोर्ड, काउन्सिलरहरु लगायत रेष्टुरेन्टका नियमित ग्राहक सहभागी थिए ।

कार्यक्रममा मेयर कार्टरले गोर्खा सैनिक, रेष्टुरेण्ट खाना र उसको च्यारिटी कार्यको प्रशंसा गरेकी थिइन् । काउन्सिल लिडर काउन्सिलर डेभिड क्लीफोर्डले भिसी थापाको सालिक निर्माणमा सहयोग गरेकामा रेष्टुरेन्टलाई धन्यवाद दिए । स्मरण रहोस्, उक्त सालिकका लागि रश्मोर बरोले जग्गा उपलब्ध गराई रेखदेखको जिम्मा समेत लिएको छ ।

गोर्खा प्यालेसका प्रवन्ध निर्देशक गुरुङकी धर्मपत्नी बबिता गुरुङले सञ्चालन गरेको उक्त कार्यक्रममा ६ वर्षीय छोरा साकारले स्वागत मन्तव्य दिंदै सालिक निर्माण र ‘भिजिट नेपाल २०२०’ अभियानलाई सघाउन अपिल गरेपछि मेयरसहित उपस्थित पाहुना दंग परेका थिए । मेयर कार्टरले त मन्तव्यका क्रममा साकारलाई अगाडि बोलाएर उनको तारिफ गर्दै फोटो खिचाइन् ।

कार्यक्रममा ‘भिजिट नेपाल २०२०’ को प्रचारप्रचारका लागि टेम्पोमार्फत पृथक शैली अपनाइएको थियो । भिजिट नेपालको पोस्टर राखिएको टेम्पोमा बसेर सहभागीले तस्विर समेत लिए । नेपाल भ्रमण वर्ष प्रचारका लागि विदेशीहरुलाई उक्त टेम्पोमा घुमाउने योजना समेत गोर्खा प्यालेसको छ । रेष्टुरेन्टका सबै सदस्यहरुले पनि ‘भिजिट नेपाल २०२०’ को लोगो अंकित टिसर्ट लगाएका थिए ।

वार्षिकोत्सवमा विभिन्न सामानहरुको अक्सन र ‘राफल ड्र’ गरि च्यारिटी रकम संकलन गरिएको थियो । अक्सन र राफलका लागि कार्यक्रममा सहभागी रेष्टुरेन्टका ग्राहकहरुले नै घोडा रेसका टिकट, फुटबल म्याचका टिकट, थोर्प पार्कका टिकटसहित खुकुरी, चित्रकला लगायतका सामग्री सौजन्य गरेका थिए ।

गोर्खा प्यालेसले स्थापनाकाल देखि नै बेलायत र नेपालमा पालैपालो च्यारिटी गर्दै आएको छ ।

तस्बिर: मिलन तमु