नेपालब्रिटेन डट कम्
काठमाडौ । साउदी अरबमा समस्यामा रहेका नेपाली कामदारको समस्या समाधान गर्न सरकार गम्भीर नभएको आज यहाँ आयोजित कार्यक्रमका वक्ताले बताएका छन् ।
नेपाली साझा मञ्चले आज यहाँ आयोजना गरेको ‘वैदेशिक रोजगारीका क्रममा साउदी अरबमा देखिएको समस्या समाधान विषयक अन्तक्र्रिया तथा पत्रकार सम्मेलन’का सहभागीले साउदीको समस्या समाधान गर्न सरकारले तत्काल उचित कदम चाल्नुपर्नेमा जोड दिए ।
अहिले सयौँको सङ्ख्यामा नेपाली साउदी अरबमा समस्यामा परेको र खान बस्नसमेत समस्या भोग्नुपरेकोले तत्काल उद्धार गर्नुपर्नेमा उनीहरुले जोड दिए ।
पूर्वश्रम तथा रोजगारमन्त्री कमल चौलागाईंले साउदी अरबबाट पाठ सिक्दै देशभित्रै रोजगारीको सिर्जना गर्न सरकारले पर्याप्त ध्यान दिनुपर्ने धारणा राख्नुभयो । उहाँले युवाले विदेशबाट पठाएको विप्रेषणले देश धानेको छ भन्दै हिँड्ने तर ती युवाहरु समस्यामा पर्दा सरकार मुकदर्शक भएर बस्न नहुने टिप्पणी गर्नुभयो ।
श्रम तथा रोजगार मन्त्रालयका प्रवक्ता गोविन्दमणि भुर्तेलले साउदी अरबमा समस्यामा रहेका नेपाली कामदारको समस्या समाधान गर्न सरकारले पर्याप्त पहल गरिरहेको जानकारी दिनुभयो । उहाँले साउदी अरबमा रहेको नेपाली दूतावासमार्फत समस्यामा रहेका कामदारको उद्धार कार्यलाई तिव्रता दिइएको बताउनुभयो ।
आयोजक मञ्चका अध्यक्ष रामकृष्ण घिमिरेले नेपाल सरकारले साउदी सरकारसँग समन्वय गरेर त्यहाँ रहेको सम्पूर्ण नेपालीको अवस्थाबारे जानकारी लिनुपर्ने भनाइ राख्नुभयो ।
