October 24, 2020
3:43 AM | 8:28 AM

एनआरएनए युकेद्धारा राहत वितरण

  27/04/2020 मा प्रकाशित

लण्डन । गैर आवासीय नेपाली संघ (एनआरएन) यूकेले बेलायतमा कोरोनाको कारण सृजित समस्यामा परेकाहरुलाई राहत तथा सहयोग उपलब्ध गराउन शुरु गरेको छ । राहत वितरणको पहिलो चरणमा बेलायतमा अध्ययनरत ३० जना नेपाली बिधार्थीहरुलाई आवश्यक खाध्यान लगायतको राहत घरमै डेलिभरी गरिएको छ ।

जसअन्तर्गत राहत पाउनेमा बर्मिङगम यूनिभर्सिटी, हडर्सफिल्ड यूनिभर्सिटी, यूनिभर्सिटी अफ लंकास्टर, कम्ब्रिया यूनिभर्सिटी लगायत लिभरपुल, वुल्भरह्याम्पटन, वेल्स र लन्डनका बिद्यार्थीहरुलाई दाल, चामल, तेल जस्ता अत्यावश्यक सामाग्री वितरण गरिएको हो । एनआरएन यूके हेल्पलाईनमा प्राप्त १६० बिद्यार्थीहरुको समस्या दर्ज भएपछी पहिलो चरणमा रेड जोनमा रहेका बिद्यार्थीहरुलाई राहत वितरण गरिएको हो ।

एनआरएन यूके मार्फत राहत बाहेक प्रार्थमिक रुपमा विद्यार्थी हरुलाई सहयोग र राहतमा यूनिभर्सिटीको आफनै स्रोत प्राप्त गर्न सकिने बारे परामर्श प्रदान गर्नुका साथै कामको लागी समेत सघाउ पुर्याईएको छ ।
कोरोना संक्रमणको कारण ज्यान गुमाएका नेपालीहरु स्वर्गीय प्रशान्त अर्याल ,घनविर थापा र हरि प्रसाद चेम्जोंगको परिवारलाई आर्थिक सहयोग उपलब्ध गराईएको छ ।

त्यसैगरी बेलायतका बिभिन्न ठाउँमा बिशेषत पूर्वगोर्खाको परिवार र वृद्दवृद्दाहरुलाई मास्क, सेनीटाईजर, प्यारासिटामोल लगायतका स्वास्थ्यसामग्री वितरण गरिएको छ । अल्डरसट, फार्नबरो, रेडिंग, बेजिंगस्टोक र प्लमस्टिडमा वितरण गरिएका सामाग्री अधिकांश दाताहरु बाट निशुल्क प्राप्त भएका हुन । बिभिन्न क्षेत्रमा गरेर अहिले सम्म झन्डै ४ सय जनालाई यी सामग्री प्रदान गरिएको छ ।
यसका अलावा एनआरएन यूकेको हेल्पलाईनमा आएको अनुरोध बमोजिम कोरोना संक्रमित बिमारीहरुलाई बेलायतमा कार्यरत बिभिन्न डाक्टरहरुसंग सिधै सम्पर्क गराउदै आईरहेको छ । अत्यन्तै प्रभावकारी देखिएको यो सेवाको अहिले सम्म दर्जनौ व्यक्तिहरुले लाभ लिइसकेका छन ।

सिमीत स्रोत र साधनका बीच एनआरएन यूकेले सिधै आर्थिक सहयोग गर्ने भन्दा पनि सम्बन्धित निकाय तथा अन्य स्रोतबाट प्राप्त गर्न सकिने सहयोगको लागि समन्वय समेत गर्दै आइरहेको छ ।
सबै स्रोतका विकल्पहरु नभएर निकै कठिन अवस्थाबाट गुज्रिरहेका बिद्यार्थी तथा अन्य सहयोगका याचकहरुलाई उनीहरुको आवश्यकतालाई पहिचान गर्दै एनआरएनए यूकेले सहयोग संकलन संगै थप राहत वितरणलाई पनि तिब्रता दिने तयारी गरेको छ ।
कोरोना महामारीको वर्तमान संकटपूर्ण अवस्थामा बेलायतमा समस्यामा रहेका नेपालीहरुलाई एनआरएन यूकेले संचालन गरेको हेल्पलाईन मार्फत सम्पर्कमा आउनुहुन समेत सादर अनुरोध गर्दछौ ।
– फडिन्द्र भट्टराई

प्रतिक्रिया