१६ चैत्र २०८०, शुक्रबार
Follow Us

ब्रिटिस गोर्खा वेलफेयरद्वारा स्वास्थ्य सामग्री प्रदान

नेपालब्रिटेन संवाददाता
१० जेष्ठ २०७७, शनिबार १६:१९

ब्रिटिस गोर्खा वेलफेयर दिक्तेलले जिल्ला अस्पताललाई स्वास्थ्य सामग्री उपलब्ध गराएको छ । कोरोना भाइरसको सङ्क्रमण रोकथाम तथा नियन्त्रणमा सहयोग पु-याउने उद्देश्यका साथ वेलफेयरले अस्पताललाई सर्जिकल मास्क, गाउन, पञ्जालगायतका स्वास्थ्य सामग्री प्रदान गरेको हो ।

वेलफेयरले ५०० थान सर्जिकल मास्क, १०० थान डिस्पोजल सर्जिकल गाउन, १०० थान फेस सिल्ड, १०० थान केएन ९५ मास्क, २०० थान सर्जिकल पञ्जा, १०० थान सुकभर, १०० थान हेडक्याप र ५०० थान डिस्पोजेबल पञ्जा प्रदान गरेको जिल्ला अस्पतालका निमित्त कार्यालय प्रमुख रवीनकुमार फुयाँलले बताउनुभयो । वेलफेयरका प्रमुख सुवास राईले आज अस्पताल सञ्चालन तथा विकास समितिका सदस्य ध्रुवलक्ष्मी राईलाई स्वास्थ्य सामग्री हस्तान्तरण गर्नुभएको हो ।

जिल्लाको एकमात्र सरकारी अस्पताललाई यसअघि नेपाल सरकार स्वास्थ्य तथा जनसङ्ख्या मन्त्रालय, स्वास्थ्य सेवा विभागले पनि स्वास्थ्य सामग्री उपलब्ध गराएको थियो । सामग्री नहुँदा कोरोना परीक्षणको काम नै रोकिएको अवस्थामा वेलफेयर तथा स्वास्थ्य सेवा विभागले स्वास्थ्य सामग्री उपलब्ध गराएसँगै परीक्षणको कामलाई अगाडि बढाइने अस्पताल सञ्चालन तथा विकास समितिका अध्यक्ष एवं जिल्ला समन्वय समितिका प्रमुख बवि चाम्लिङले बताउनुभयो ।

दुई नगरपालिका र आठ गाउँपालिका रहेको जिल्लाका स्थानीय तहले भने आआफ्नो क्षेत्रमा स्थापना गरेको कोरोना रोकथाम तथा नियन्त्रण कोषमा जम्मा भएको रकमले स्वास्थ्य सामग्री खरिद गरेर परीक्षण गरिरहेका छन् ।