October 27, 2020
11:40 AM | 5:25 PM

एनआरएन दिवस – एनआरएनए युकेमा सकारात्मक शुरुआत : सल्लाहकारहरु

  12/10/2020 मा प्रकाशित

लन्डन । एनआरएनए दिवसको अवसर पारेर आइतबार एनआरएनए यूकेले आफ्ना सल्लाहकारहरुसँग एक भब्य छलफल कार्यक्रम गरेको छ ।
‘भर्चुअल छलफल’ मा सहभागी सल्लाहकारहरुले संस्थाका हालसम्मका गतिविधिहरुमाथि समिक्षा गर्दै भावी कार्यहरुको लागि आ-आफ्ना सल्लाह, सुझाव पेश गरे ।
गत वर्ष पुनम गुरुङ नेतृत्वमा निर्वाचित कार्यसमितिबाट मनोनित सल्लाहकारहरुसँग पहिलोपटक छलफल कार्यक्रम आयोजना गरिएको हो । जसमा संस्थाका डेढ सय बढी सल्लाहकारमध्ये आधाभन्दा धेरै उपस्थित थिए ।
कार्यक्रममा सल्लाहकारहरुलाई स्वागत गर्दै एनआरएनए यूके अध्यक्ष पुनम गुरुङले आफू नेतृत्वको कार्यसमितिले विगत एक वर्षमा सक्दो काम गर्ने कोशिस गरेको बताइन् ।
बाँकी एक वर्षमा अझै राम्रो कामहरु गर्ने प्रतिबद्धता जनाउँदै उनले भनिन्, ‘हामी साँच्चीकै काम गरेर देखाउन चाहन्छौं । गत एक वर्षमा जति सक्यौं, कोशिस गरेकै छौं जस्तो लाग्छ । अब बाँकी एक वर्षमा पनि अझै धेरै, अझै राम्रो गर्ने हाम्रो लक्ष्य छ । तपाईंहरु मार्गदर्शन र सल्लाह, सुझाव दिंदै जानुहोस्, हामी काम गरेर देखाउनेछौं ।’

समुदायको चाहना र अपेक्षाअनुरुप संस्थालाई अघि बढाउने र कमीकमजोरी सुधार गर्दै जाने प्रयास थालिएको अध्यक्ष गुरुङको भनाइ छ ।
कार्यक्रममा सहभागी सल्लाहकारहरुले वर्तमान कार्यसमितिले विगत एक वर्षको अवधिमा सकारात्मक शुरुआत गरेको तर अझै धेरै गर्न बाँकी रहेको धारणा व्यक्त गरे । संस्थाप्रति बेलायतबासी हजारौं गैरआवासीय नेपालीको चासो र सरोकार रहेको सन्दर्भमा सबैको भावनालाई समेट्दै अघि बढ्न उनीहरुले शुभकामना पनि दिए ।

अधिकांश सल्लाहकारहरुले संस्थामा सरल सदस्यता कार्यबिधी, नागरीकता निरन्तरता, गोर्खाजको समस्या तथा आर्थिक पारदर्शिताको विषयमा समुदायको विशेष चासो रहेको भन्दै त्यसको सम्बोधन हुने गरी अघि बढ्न सुझाव दिए । तर अघिल्ला कार्यसमितिहरुका पालामा भएका कमजोरीका लागि अहिलेको समितिलाई दोषारोपण गरि रहनु काम गर्न हतोत्साहित गर्नु न्यायसंगत नहुने मत प्राय सबैको थियो।
सोहि अवसरमा संस्थाका सल्लाहकार एवम् आर्थिक जाँचबुझ समितिका संयोजक एकाउन्टेन्ट एलएन पाण्डेले समितिले काम शुरु गरिसकेको भन्दै प्रतिवेदन तयार भइञ्जेल धैर्य गर्न आग्रह गरे ।
त्यसअवसरमा संस्थाका पदाधिकारीहरुले पछिल्लो एक वर्षमा सम्पन्न मुख्य गतिविधि र प्रगतिबारे सल्लाहकारहरुमाझ प्रिजेन्टेसन गरेका थिए भने आईसीसी सदस्यहरु रामशरण सिमखडा, ललित न्यौपाने, योग कुमार फगामी लगायतको उपस्थिती थियो ।

कार्यक्रममा महासचिव फडिन्द्र भट्टराईले कोभिड १९ महामारीका बेला सञ्चालन गरिएको सहयोग अभियान, नेपाली नागरिकता निरन्तरताको पक्षमा नेपालको राजनीतिक तहमा गरिएका पहलहरुका साथै नागरिकता, गोर्खा, महिला, नयाँ पुस्ता लगायतसंग सम्बन्धित विषयमा गरिएका विभिन्न कार्यक्रम र अन्तरक्रियाहरुको विवरण प्रस्तुत गरे । कोषाध्यक्ष तेजेन्द्र रोकाले संस्थाको आर्थिक गतिविधिहरुबारे अपडेट प्रस्तुत गरेका थिए भने उपाध्यक्ष श्रीमती रोजीना प्रधान राई, ईग्याण्ड राज्य समितिका अध्यक्ष दीपक श्रेष्ठ लगायतको उपस्थिति रहेको थियो।

प्रतिक्रिया