नेपालब्रिटेन संवाददाता
काठमाडौं । मंगलबार कोरोना भाइरसका ३ हजार ५५६ जना नयाँ संक्रमित थपिएका छन् । १५ हजार ५७७ पीसीआर परीक्षण गदा ३ हजार ५५६ जना संक्रमित थपिएको स्वास्थ्य तथा जनसंख्या मन्त्रालयले जनाएको छ । मन्त्रालयका प्रवक्ता प्राडा जागेश्वर गौतमका अनुसार आज देशभर सक्रिय संक्रमितको संख्या ३५ हजार ९१५ पुगेको छ । जसमध्ये संस्थागत आइसोलेसनमा १५ हजार ४८ जना र होम आइसोलेसनमा २० हजार ८६७ जना रहेका छन् ।
पछिल्लो २४ घण्टामा देशभर १ हजार ५०३ जना संक्रमित निको भएका छन् । संक्रमण मुक्त हुने अहिलेसम्म ७८ हजार ७८० जना पुगेका छन् । यो कुल संक्रमितको ६८ दशमलव ३ प्रतिशत हो । निको हुनेको दर घटेको छ भने सक्रिय संक्रमितको संख्या निरन्तर बढिरहेको मन्त्रालयले जनाएको छ ।
काठमाडौंमा थपिए २१२९ संक्रमित
देशकै सबै भन्दा ठुलो कोरोनाको हटस्पट बनेको राजधानी काठमाण्डौं उपत्यकामा आज पनि दुई हजार माथि संक्रमित थपिएका छन् । आज उपत्यकामा २ हजार एक सय २९ जना थपिएको स्वास्थ्य मन्त्रालयका प्रवक्ता डा. जागेश्वर गौतमले जानकारी दिए । आज काठमाण्डौमा १७४६, भक्तपुरमा १६७ र ललितपुरमा २१६ जना रहेका छन् । यो देशभर थपिएका संक्रमितको ६० प्रतिशत हाराहारी हो ।
१८ जनाको मृत्यु
पछिल्लो २४ घण्टामा १८ जनाले ज्यान गुमाएको स्वास्थ्य मन्त्रालयले जनाएको छ । सुनसरीमा ३ जना, काठमाण्डौमा ३ जना , ललितपुरमा १ जना, रुपन्देहीमा १ र चितवनका एक जना रहेका छन् । यो सगैँ देशभर कोरोनाका कारण मृत्यु हुनेको संख्या ६४५ पुगेको छ । यो भनेको कुल संक्रमितको ०.५८ प्रतिशत हो ।
यसै गरी २७९ जनाको आईसियुमा र ६७ जनाको भेन्टिलेटरमा उपचार भईरहेको छ । यस्तै हाल सम्म कोरोनाबाट डिस्चार्ज हुनेको संख्या ७७ हजार २७७ पुगेको छ । आज १४७३ जनाले कोरोना जीतेका छन् । यो भनेको कुल संक्रमितको ७० प्रतिशत भन्दा कम हो ।
