नेपालब्रिटेन संवाददाता
लन्डन । इंग्लिस प्रिमियर लिगमा टोटनह्यामले वेष्टह्याम युनाइटेडसँग तीन गोलको बराबरी खेलेको छ । घरेलु मैदानमा भएको खेलमा टोटनह्याम ३ गोलको अग्रता जोगाउन सकेन । टोटनह्यामले २० मिनेट भित्र नै तीन गोल गरेको थियो ।
खेलको पहिलो मिनेटमा नै सन ह्युङ मिङको गोलमा टोटनह्यामले अग्रता बनायो । उनले हेरी केनको पासको सदुपयोग गरेका थिए । त्यसपछि आठौं मिनेटमा केनले सनको पासमा टिमको अन्तर दुई शुन्यमा पुर्याए । १० मिनेट भित्र नै दुई गोल गरेको टोटनह्यामले १६ औं मिनेटमा तेस्रो गोल थप्यो ।
यसपटक पनि केनले ब्यक्तिगत दोस्रो तथा टिमका लागि तेस्रो गोल गरे । पहिलो हाफमा तीन गोलको अग्रता बनाएको टोटनह्यामले दोस्रो हाफमा पनि आक्रामक खेल खेलेको थियो ।
५२ औं मिनेटमा हेरी केनको प्रहार पोष्टको निकै नजिकबाट बाहिरीयो । खेलको ६७ औं मिनेटमा जोजे मोउरिन्होले ग्यारेथ बेललाई मैदानमा प्रवेश गराएका थिए । उनले दोस्रो पटक प्रिमियर लिगमा डेब्यु गर्ने मौका पाए । उनी मैदान प्रवेश गरेको केहि मिनेटमा टोटनह्यामले अर्को मौका पाएको थियो ।
जसमा हेरी केनको प्रहार पोष्टमा लागेर बाहिरीयो । वेष्टह्यामले अन्तिम १० मिनेटमा तीन गोल फर्कायो । खेलको ८२ औं मिनेटमा वेष्टह्यामले एक गोल फर्कायो ।
उसका लागि बाल्बुइनाले हुडरबाट गोल गर्न सफल भए । जसका कारण खेल तीन एकको अवस्थामा पुग्यो । त्यसको तीन मिनेटपछि वेष्टह्यामले अर्को गोल गर्यो । तर यसपटक उसले उपहार गोल पायो । कोउफलको क्रसलाई क्लियर गर्ने क्रममा सान्चेजले आफ्नो पोष्टमा गोल गर्न पुगे ।
जसका कारण खेल तीन दुईको अवस्थामा पुग्यो । खेल सकिने एक मिनेट बाँकी हुँदा वेष्टह्यामका लान्जिनीको गोलले खेल बराबरिमा टुंगिएको हो । जसका कारण टोटनह्यामले तीन अंक गुमाउन पुग्यो । बराबरीपछि टोटनह्यामको ८ अंक भएको छ भने वेष्टह्यामको सात अंक भएको छ ।
