नेपालब्रिटेन संवाददाता
काठमाडौं । नेकपा दाहाल–नेपाल समूहको स्थायी समितिको बैठक आज बस्दैछ । दिउँसो पार्टी कार्यालय पेरिसडाडामा बस्ने बैठकमा आन्दोलनको समीक्षा लगायतका विषयमा छलफल हुने कार्यसूची छ ।
आन्दोलनका लागि अन्य दलसँग सहकार्य लगायतका विषयमा पनि बैठकमा छलफल हुने नेताहरुले बताएका छन् । ओली पक्षका प्रदेश पदाधिकारी हटाएर नयाँ समायोजन गर्ने बिषय पनि बैठकका कार्यसूची छन् ।
बैठकले प्रधानमन्त्री केपी शर्मा ओलीलाई नेकपाको साधारण सदस्य समेत नरहने गरी निष्कासन गर्ने सम्भावना छ । दाहाल नेपाल समूहले केही दिनअघि ओलीलाई तीन दिनको समय दिएर स्पष्टीकरण मागेको थियो ।
प्रधानमन्त्री ओलीले प्रतिनिधिसभा विघटन गरेपछि नेकपा दाहाल–नेपाल समूह सडक संघर्षमा छ । शुक्रबार काठमाडौंमा सो समूहले प्रधानमन्त्रीको कदमको विरोधमा विरोध प्रदर्शन गरेको थियो ।
