नेपाललाई हिन्दूराष्ट्र बनाउनुपर्ने माग गर्दै आउनुभएका कालीबाबाले हिन्दूधर्म नै सबै धर्मको संरक्षक भएको बताउनुभएको छ ।हिन्दूधर्मविना नेपाल जोगिन नसक्ने दाबी गर्दे बाबाले यसको संरक्षणमा लाग्न सबैलाई आग्रह गर्नुभयो ।

आफ्नो अभियानलाई सफल बनाउन उहाँका चेला तथा तराई मधेस लोकतान्त्रिक पार्टीका नेता हृदयेश त्रिपाठीको साथमा आज चितवनको ठिमुरास्थित चितवन दुग्ध उत्पादन केन्द्रको निरीक्षण गर्न आउनुभएका बाबाले पत्रकारहरुसँग कुरा गर्दै यस्तो बताउनुभएको हो ।

तपाईं राजा जोगाउने कि हिन्दूधर्म जोगाउने अभियानमा लाग्नुभएको भन्ने पत्रकारको प्रश्नमा उहाँले भन्नुभयो-'म धर्म जोगाउन हिँडेको हुँ, राजा होइन । राजा रहने/नरहने भन्ने कुरा जनताको चाहनाको कुरा हो तर हिन्दूधर्मचाहिँ जोगिनुपर्छ ।'

 नेपाल बुद्ध जन्मिएको देश भएको र यसको सनातन धर्म हिन्दू भएकाले पनि हिन्दूधर्म सबै धर्मको संरक्षक भएको उहाँको भनाइ थियो । उहाँले पटक-टक पत्रकारसँग आफू राजावादी नभएको प्रस्ट पार्नुभयो । उहाँले संविधान बनाउँदा हरेक कुरामा जनमत सङ्ग्रह गर्नु आवश्यक भएको बताउनुभयो ।