पर्यटन तथा नागरिक उड्डयनमन्त्री शरत्सिंह भण्डारीले नेपालको अन्तर्राष्ट्रिय क्षेत्रमा गुमेको पर्यटकीय छविलाई पुनःस्थापना गर्नका लागि नेपाल पर्यटन वर्ष-२०११ को अभियान ल्याइएको बताउनुभएको छ ।

'अन्तर्राष्ट्रिय पर्यटन व्यावसायिक सम्भाव्यता तथा प्रेमको प्रतीक पाल्पाको रानीमहल दरबारको महत्व र संरक्षण' विषयमा बुधबार आयोजित गोष्ठीको उद्घाटन गर्दै पर्यटनमन्त्रीले आर्थिक विकासको मेरुदण्डका रुपमा रहेको पर्यटनलाई व्यावसायिकरुपमा ग्रामीणस्तरसम्म पुर्‍याउनुपर्नेमा जोड दिनुभयो ।

उहाँले अबदेखि बन्द, हडताल र चक्काजाम नगर्ने राजनीतिक दलहरुको प्रतिबद्धता र व्यवसायीहरुको सहभागिता नेपाल पर्यटन वर्ष-२०११ को पहिलो सफलता हो भन्नुभयो ।

मन्त्री भण्डारीले बन्द, हडतालका विरुद्ध अब जनताबाट प्रतिकार हुने विश्वास पनि व्यक्त गर्नुभयो ।नेपाल स्वयम्सेवक महासङ्घद्वारा आयोजित सो कार्यक्रममा मन्त्री भण्डारीले समाजका विभिन्न क्षेत्रमा उल्लेखनीय कार्य गर्ने व्यक्तिहरुलाई सम्मान गर्नुभएको थियो ।

कार्यक्रममा सभासद् कुलप्रसाद नेपालले पाल्पाको ऐतिहासिक रानीमहललाई पर्यटकीय गन्तव्यस्थलका रुपमा विकास गर्न एकीकृत प्रयासको खाँचो औँल्याउनुभयो ।

करिब १२० वर्षअघि खड्गशमशेर राणाले आ�नी रानी तेजकुमारीको सम्झनामा पाल्पा जिल्लामा निर्माण गरेको सो रानीमहल उत्कृष्ट आकर्षणस्थलका रुपमा रहेको छ ।

रिडी गण्डकीको तिरमा रहेको ढुङ्गैढुङ्गाको सो रानीमहल प्रेमको प्रतीकका रुपमा चर्चित रहेको छ । सरकारले यस वर्ष सो महल जीर्णोद्धारका लागि रु. १० लाख छुटयाएको छ ।

प्रा. विष्णुप्रसाद आत्रैयले ऐतिहासिक, धार्मिक र पुरातात्विक महत्वका रुपमा रहेको रानीमहललाई प्रेम दिवसमा मनाउने स्थल बताउनुपर्ने धारणा राख्नुभयो ।कार्यक्रममा वक्ताहरुले रानीमहलको संरक्षण र भौतिक विकासमा निजी क्षेत्र र सरकार सजग हुनुपर्ने, रानीमहल, रुरुक्षेत्र र श्रीनगर पार्कलाई पर्यटकीय प्याकेज स्थलका रुपमा विकास गर्नुपर्ने धारणा राख्नुभयो ।

सो धारणा राख्नेहरुमा डा. मोहनमान सैंजू, पर्यटन उद्योग महाशाखाका प्रमुख लक्ष्मण भट्टराई, साहित्यकार बाबा बस्नेत, पत्रकार आरके धर्मस्थली र महासङ्घका महासचिव तारा कार्कीले बोल्नुभएको थियो ।