गृह राज्यमन्त्री मोहम्मद रिजवान अन्सारीले प्रधानमन्त्रीको दबावपछि
बुधबार राजीनामा दिएका छन् । मन्त्रिपरिषदमा एमालेबाट सहभागीमध्ये एकमात्र
चुनाव जित्ने अन्सारी संविधानसभामा सर्लाही २ बाट निर्वाचित हुन् ।

शान्ति सुरक्षाको अवस्था खल्बलिएको भन्दै गृहमन्त्री भीम रावलको चौतर्फी
आलोचना र राजीनामा माग भइरहेका बेला प्रधानमन्त्री माधवकुमार नेपालले
मंगलबार अन्सारीलाई राजीनामा गर्न लगाएका थिए । 'राजीनामा दिने घोषणै गरेर
बसेको थिएँ । उहाँले नमागे पनि दिन्थें । तर एमालेसहितका राजनीतिक दल,
नागरिक समाज, उद्योगी व्यापारी, सञ्चार जगत, आमजनता सबैले गृहमन्त्रीको
राजीनामा मागिरहेको अवस्थामा मेरो राजीनामा माग्नुले आश्चर्यमा परेको छु,'
पद छाडेपछि कान्तिपुरसित उनले भने ।

उनले राजीनामा पत्रमा पनि शान्ति सुरक्षाको अवस्थाप्रति असन्तुष्टि जनाएका
छन् । स्रोतका अनुसार प्रधानमन्त्रीले 'भाषा मिलाउन' निर्देशन दिए पनि
उनले 'यो मेरो भावना हो' भन्दै जस्ताको तस्तै बुझाएका थिए ।  

प्रधानमन्त्री कार्यालयका सचिव लीलामणि पौडेलले बुधबारै विज्ञप्ति जारी
गरी अन्सारीको राजीनामा स्वीकृत भएको जानकारी दिएका छन् । स्रोतका अनुसार
शान्ति सुरक्षा अवस्था खस्केकामा चौतर्फी आलोचनाका कारण सत्ताकै नेतृत्व
त्याग्नुपर्ने अवस्था आएपछि प्रधानमन्त्रीले अन्सारीलाई गृह प्रशासनको
कमजोरी केलाएर सरकारको बचाउमा बोल्न उकासेका थिए । गृहमन्त्री हटाएर 'फेस
सेभिङ' गर्न खोजेका प्रधानमन्त्रीले उल्टै अन्सारीलाई नै हटाउनुमा आन्तरिक
र बाह्य दबाबले काम गरेको स्रोतको दाबी छ ।

सञ्चार उद्यमी जमिम शाह हत्यामा राज्यमन्त्री अन्सारीले 'अन्तर्राष्ट्रिय
शक्ति केन्द्र तथा आपराधिक गिरोहको हात रहेको र उनीहरू कसको इसारामा
परिचालित थिए भन्ने तथ्य छिट्टै सार्वजनिक गर्ने' बताएका थिए । एउटै
समुदाय भएकाले शाहको शवलाई काँधसमेत दिएका उनले अर्का सञ्चार उद्यमी अरुण
सिंघानियाको हत्यापछि सार्वजनिक रूपमै गृहमन्त्रीको आलोचना गर्दै आएका थिए
। एमाले केन्द्रीय कमिटीको बुधबारको बैठकमा पनि गृहमन्त्रीको राजीनामा
माग्नुपर्नेमा राज्यमन्त्रीलाई बलिको बोका बनाएको भन्दै केन्द्रीय
सदस्यहरूले प्रधानमन्त्रीको आलोचना गरेका थिए ।

शान्ति सुरक्षा खल्बलिनुमा गृहमन्त्रीको कार्यशैली प्रमुख कारण भएको भन्दै
केही दिनअघि मात्रै अन्सारीले आफू गृहमन्त्री भएको भए एक मिनट पनि नबस्ने
घोषणा गरेका थिए । आफूलाई हटाए सत्ताको नेतृत्व गर्न र टिकाउन गरेका हरेक
गलत कामको भण्डाफोर गरिदिने गृहमन्त्री रावलले प्रधानमन्त्रीलाई धम्की
दिएपछि परिस्थिति फेरिएको स्रोतको दाबी

छ । गृहमन्त्री रावलकै चेतावनीपछि प्रधानमन्त्रीले अन्सारीको राजीनामा
मागेको एक वरिष्ठ एमाले नेताले बताए । 'सत्ता समीकरण टिकाउन भएका हर
वैध/अवैध कामको सहयोगी भएकाले पनि रावलसँग प्रधानमन्त्री हच्कन्छन् ।
गृहको नेतृत्व सम्हालेका हिसाबले सत्तारूढ दलका कतिपय अवैध क्रियाकलापमा
पर्दा हाल्ने काममा पनि उनकै सहयोग छ । त्यसैले पनि प्रधानमन्त्री रावललाई
हटाउन सक्दैनन्,' ती नेताले भने । रावलले गत असार ९ गते लिखितै रूपमा
थुप्रै विषयमा अधिकार प्रत्यायोजन गरे पनि  व्यवहारमा लागू नभएपछि
गृहराज्यमन्त्री अन्सारी रुष्ट बन्दै आएका थिए ।