सूचना तथा सञ्चारमन्त्री एवम् सरकारका प्रवक्ता शङ्कर पोखरेलले प्रत्येक नागरिकले आफ्नो अधिकारका साथै कर्तव्य बिर्सन नहुने बताउनुभएको छ ।

नेपाल टेलिकम वर्कस युनियनको सातौँ अधिवेशनका अवसरमा सोमबार राजधानीमा आयोजित कार्यक्रममा उहाँले टेलिकमका कर्मचारीप्रति इङ्गित गर्दै भन्नुभयो-"अधिकारसँग कर्तव्य पनि जोडिएको हुन्छ । यो मान्यताविना लोकतन्त्र चल्न सक्दैन । अतः अधिकार खोज्दा कर्तव्यलाई ख्याल गरियो भने जुनसुकै समस्याको समाधान निस्कन्छ ।"

मन्त्री पोखरेलले टेलिकमका पुराना कर्मचारीको सो कम्पनीमा सेयर लगानी भएकाले टेलिकमको सफलता असफलताको जिम्मेवार कर्मचारीसमेत हुने बताउनुभयो ।

कम्पनीभित्रका समस्या व्यवस्थापन पक्ष र कर्मचारीको समझदारीमा समाधान गर्नुपर्ने बताउँदै उहाँले टेलिकमलाई बाहिरका भन्दा भित्रकै चुनौतीको खतरा छ भन्नुभयो । प्राविधिक र व्यवस्थापकीय बाहेक नीतिगत निर्णय गर्न परे आफ्नो मन्त्रालय सधैँ तयार हुने विश्वास दिलाउँदै मन्त्री पोखरेलले पूर्वाधारहरुको निकास गरेर वा बजारअनुसार क्षमता बढाएर टेलिकमलाई प्रभावकारी, गुणस्तरयुक्त र आयमूलक बनाउन सकिने सुझाव दिनुभयो ।

सरकार टेलिकमलाई स्वायत्तता दिनुपर्छ भन्ने पक्षमा रहेको प्रष्ट पार्दै उहाँले भन्नुभयो- राम्रो काम गर्ने कम्पनीलाई सरकारले हस्तक्षेप गर्दैन । टेलिकमले त झन् नाफा कमाएर सबैलाई प्रेरणा दिएको छ । सोही कार्यक्रममा नेपाली काङ्ग्रेसका वरिष्ठ नेता शेरबहादुर देउवाले नयाँ संविधानमा श्रमिकहरुको बढिभन्दा बढी अधिकारको ग्यारेन्टी गर्नेमा आफ्नो पार्टी प्रतिबद्ध रहने बताउनुभयो ।

एकअर्को प्रसङ्गमा उहाँले एकीकृत नेकपा -माओवादी) का सेनाहरुको समायोजन र वाइसिएलको अर्थ सैन्य संरचना भङ्ग भएमात्र शान्ति कायम हुने विचार राख्नुभयो । सूचना तथा सञ्चार मन्त्रालयका सचिव सुशील घिमिरेले सरकारले अहिलेसम्म कुनै नीतिगत निर्णय थाँती नराखेको बताउँदै सरकारी संस्थान वा कम्पनी र कर्मचारीको हितमा ध्यान दिई प्रक्रियागत रुपमा जुनसुकै निर्णय गर्न तयार रहने छ भन्नुभयो ।

नेपाल टेलिकमका प्रबन्ध निर्देशक अमरनाथ सिंहले ठाउँ-ठाउँमा भएको केबुल, मोबाइलको ब्याट्री, फाइवर आदि चोरीले हेर्दा टेलिकमलाई असफल पार्न स्वार्थ समूहबाट षड्यन्त्र भइरहेको हुनसक्ने आशङ्का गर्नुभयो ।

टेलिकम अहिले ३५० प्रतिशत नाफामा रहेको जानकारी दिँदै उहाँले देशका ३ हजार ९१५ गाविसमा नै मोबाइल सेवा पुर्‍याउने काम भइरहेको छ भन्नुभयो ।
नेपाल ट्रेड युनियन काङ्ग्रेस -स्वतन्त्र) का अध्यक्ष लक्ष्मणबहादुर बस्नेतले नयाँ संविधानमा आम श्रमिक, मजदुरहरुको अधिकार सुनिश्चित हुनुपर्नेमा जोड दिनुभयो ।

सोही क्रममा नेपाल राष्ट्रिय कर्मचारी सङ्गठन, नेपाल टेलिकम कर्मचारी युनियन, नेपाल दूरसञ्चार कम्पनी कर्मचारी परिषद्, नेपाल सार्वजनिक सेवा कर्मचारी सङ्घका प्रतिनिधिले टेलिकमको सेवा गुणस्तरयुक्त हुनुपर्ने, टेलिकममा भइरहेको आर्थिक घोटाला र राजस्व चुहावट बन्द गरिनुपर्ने, टेलिकममा कार्यरत पछिल्लो पुस्ताका कर्मचारीहरुको रोजगारीको ग्यारेन्टी गरिनुपर्नेमा जोड दिनुभयो ।

सो अधिवेशन यही माघ २७ गतेसम्म चल्ने बताइएको छ ।