एकीकृत नेकपा माओवादीका अध्यक्ष पुष्पकमल दाहाल प्रचण्डले एकीकृत नेकपा माओवादी विस्तुत शान्ति सम्झौता अनुसार नै चल्न चाहेको बताउनु भएको छ।

उहाँले संविधान नबनाउन र नेपालमा स्थायीत्व कायम हुन नदिने देशीविदेशी शक्ति लागिपरेको भन्दै उनीहरुको विरुद्धमा माओवादी उत्रेको बताउनु भयो।
रोल्पाको दहबनमा रहेको जनमुक्ति सेनाको पाँचौ डिभिजनबाट अनमिनको मापदण्डमा नपरेका अयोग्य लडाकुहरुलाई सोमबार गरिएको विदाई कार्यक्रममा अध्यक्ष प्रचण्डले यस्तो बताउनु भएको हो।

माओवादी ठूला पार्टीको रुपमा भएकाले माओवादीकै पक्षमा संविधान बन्ने डर देशभित्रैकै पूरातनवादी शक्तिहरुले संविधान बन्न नचाहेको आरोप लगाउँदै अध्यक्ष प्रचण्डले अहिले शान्ति र संविधान बनाउने चुनौतिलाई सामना गर्ने बेला आएको बताउनुभयो।

अध्यक्ष प्रचण्डले केही दिनपहिले सम्पन्न पार्टीको स्थायी समितिको बैठकले अन्य दलभित्रका संविधान विरोध शक्तिलाई पाखा लगाउन आग्रह गरेको पनि बताउनुभयो। उहाँले अनमिन अयोग्य ठहर्‍याएका अयोग्य लडाकुहरुलाई संविधान लेखन र नयाँ नेपाल निर्माणको अभियान लागिरहन आग्रह पनि गर्नुभयो।

विदाई समारोहमा अनमिन प्रमुख करिन ल्यान्नग्रेन, माओवादी स्थायी समिति सदस्य वर्षमान पुनः, माओवादी सेना प्रमुख नन्दकिशोर पुनः, डेपुटी कमाण्डर चन्द्र प्रकाश खनाल लगायतको सहभागिता रहेको थियो।

पाँचौ डिभिजन मुख्यालय दहबनसहित सहायक शिविरहरु गैरीगाउँको ठिला, उघा, भोलेरीको खस्रे र दाङको सङनाममा रहेका मापदण्डमा नपरेका लडाकुहरुलाई शिविरबाट सोमबार विदाई गरिएको छ।

२८१ जनालाई सोमबार विदाई गरिएको हो। माप दण्डमा नपरेका ४९६ जनामध्ये केहीले भने यसअघि नै शिविर छाडिसकेको पाँचौ डिभिजन कार्यालयले जनाएको छ।