१६ चैत्र २०८०, शुक्रबार
Follow Us

सरकारमाथि नैतिक प्रश्न खडा भयो : एमाले, फेरि प्रयास गछौं : काँग्रेस

नेपालब्रिटेन डट कम्
५ भाद्र २०७४, सोमबार १७:११

काठमाडौं । नेपालको संविधानको दोस्रो संशोधन विधेयक प्रस्ताव अस्वीकृत भएपछि विभिन्न राजनीतिक दलले मिश्रित प्रतिक्रिया दिनुभएको छ । व्यवस्थापिका–संसद्को आजको बैठकबाट अस्वीकृत भएको उक्त विधेयकबारे प्रतिक्रिया दिँदै प्रमुख प्रतिपक्षी दल नेकपा (एमाले) संसदीय दलका उपनेता सुवास नेम्वाङले विधेयकलाई विशेष समितिमा लगेर छलफल गरौँ भनेर आफूहरुले पटक पटक जोड दिँदै आएको तर सरकारले पर्याप्त छलफल नगरेकाले अहिलेको परिणाम आएको टिप्पणी गर्नुभयो । यद्यपि परिणाम जस्तो आए पनि यसले संविधानलाई सर्वस्वीकृत तुल्याएको उहाँले उल्लेख गर्नुभयो । नेता नेम्वाङले संशोधनको प्रस्ताव अस्वीकार भएसँगै सरकारमाथि नैतिक प्रश्न खडा भएको पनि बताउनुभयो ।
सत्तारुढ नेपाली काँग्रेसका नेता डा प्रकाशशरण महतले अहिलेलाई अस्वीकृत भएको संविधान संशोधनको भावना सम्बोधन गर्नका लागि काँग्रेसका तर्फबाट फेरि प्रयास हुने बताउनुभयो । राष्ट्रिय जनता पार्टीका नेता लक्ष्मणलाल कर्णले विधेयकको परिणाममाथि पार्टीको बैठक बसेर आधिकारिक धारणा ल्याइने बताउनुभयो । सङ्घीय समाजवादी फोरम नेपालका नेता डा शिवजी यादवले सबैको सहमतिमा प्रस्ताव लैजानुपर्नेमा सरकारले छलफल नगरी लगेको बताउँदै संशोधन अस्वीकृत हुनुमा अन्ततः तीन वटै ठूला दलको मिलेमतो रहेको आरोप लगाउनुभयो ।