बागलुङ । बागलुङमा आगामी माघमा ‘बागलुङ गोल्डकप फुटबल प्रतियोगिता–२०७३’ हुने भएको छ । दलिय युवा सञ्जाल बागलुङले माघे सङ्क्रान्ति पर्वको अवसर पारेर प्रतियोगिता आयोजना गर्न लागेको हो । माघ १ देखि ५ गतेसम्म स्थानीय बाङ्गेचौर खेल मैदानमा हुने प्रतियोगिताको तयारी तीव्र पारिएको आयोजकले जनाएको छ ।

प्रतियोगितामा विजेता समूहलाई रु एक लाख र उपविजेतालाई रु ५० हजार नगद पुरस्कार प्रदान गरिनेछ । प्रतियोगितामा सर्वोत्कृष्ट खेलाडीलाई नगद रु १० हजार, सर्वाधिक गोलकर्तालाई रु १० हजार, उत्कृष्ट गोलकिपर, उत्कृष्ट डिफेन्स, उत्कृष्ट मिड फिल्डर, फरवार्डर, अनुशासित समूह, प्रशिक्षकलाई रु पाँच हजारका दरले पुरस्कार दिने व्यवस्था गरिएको छ ।

प्रतियोगिता सम्पन्न गर्न कुल रु ११ लाख ९१ हजार ५०० खर्च लाग्ने अनुमान गरिएको सञ्जालका अध्यक्ष राजकुमार बोसेलले जानकारी दिनुभयो । “बागलुङमा फुटबल गतिविधि सुस्ताएपछि प्रतियोगिता आयोजना गरेका हौँ” अध्यक्ष बोसेलले भन्नुभयो “आवश्यक खर्च जुटाउन सहयोग अभियान चलाएका छौँ, सबै पक्षको सहयोगको अपेक्षा गरेका छौँ ।”

सञ्जालले दुई वर्षअघि पनि ठूलो पुरस्कार राशिको ‘इमेज गोल्डकप’ आयोजना गरेको थियो । त्यसयता बागलुङमा फुटबलको ठूला प्रतियोगिता हुन सकेका थिएनन् । सञ्जालले अबदेखि बर्सेनि बागलुङ गोल्डकपको नाममा प्रतियोगितालाई निरन्तरता दिने जनाएको छ ।